台語長篇小說《大港嘴》連載 05

[胡長松]

「你看這是外呢可笑的代誌﹐你看王一鏢。」

「王一鏢是按怎矣？」

「伊共hia阿山á兵講﹐烏索仔所有一切的『反抗的活動』攏是伊tshūa頭計畫的。」

「明明就毋是矣！」

「就是毋！實在講﹐哪有啥物『活動』？明明是無代無誌hông掠來的……閣愈免講啥物『反抗』﹐kán﹐伊若閣按呢展威風烏白tsùaⁿ﹐怹爸會死佇伊的嘴--nih。」

「伊閣有講啥？」

「伊閣講廟口的宋江陣就是咱大港嘴百年來的義勇軍﹐是誰都演袂倒的﹐阿王爺若顯靈﹐欲共怹làm ka̍h做狗pê。」

「Taⁿ害啦﹐這聲看欲按怎死就好？我看﹐規个宋江陣的人攏會予伊害害死。」

「你放心啦！橫直攏掠來矣﹐欲刣欲剮就凊睬怹矣啦！」

　　王一鏢的牽手好--a真後悔無共王一鏢擋leh﹐彼工落真大的雨﹐王一鏢無提雨傘就出門。人講尪á某鬥陣久﹐心會相通﹐就是按呢﹐好--a自伊出門就知影伊袂閣轉來矣。「是按怎欲hiah呢tshóng-pōng？」好--a踅踅唸﹐伊想袂通﹐伊乾焦知影伊的尪婿王一鏢是bat予日本人調去做軍伕的最後一批兵。怹坐一台tho-la-khuh欲去後山的兵仔營受訓﹐出發晉前﹐怹排一列佇港墘﹐有人pûn鼓吹送怹起程﹐hín時王一鏢的面紅膏赤tshih 袂輸廟裡拄油漆的關帝君的尪á頭。結局﹐怹彼批兵猶袂出戰﹐日本天皇就玉音放送宣佈投降矣。落真大的雨彼工﹐好--a看王一鏢的面仝款紅膏赤tshih ﹐毋過這擺是對付阿山仔﹐伊自頭就憂頭結面﹐煩惱伊無法度平安轉來。聽講怹無三二下手就共阿山仔圍佇派出所﹐阿派出所裡有足濟槍佮槍子﹐怹無愛起衝突。怹講：王一鏢你受訓過﹐話閣會通﹐你來tshūa頭佮怹hia阿山仔講﹐叫怹退出烏索仔﹐a̍h你若毋敢就準煞！王一鏢應講：「哪會有準煞的代誌？交予我！」就是按呢﹐好--a看伊紅膏赤tshih出門﹐而且心肝頭刺tshak真歹吉兆﹐結局﹐王一鏢這个出門就誠實無轉來矣。過無外久﹐閣較濟兵位庄仔外來﹐槍一彈﹐大港嘴就成做一个li-li-lap-lap唉爸叫母的所在矣。王一鏢予怹掠去了後﹐失去消息﹐好--a千拜託萬拜託﹐問無伊的死活﹐只好去求港邊的海王爺。海王爺賜二句講：「命到戊子前﹐氣留大樹跤」﹐好--a m-bat﹐叫是講戊子是啥物人﹐四界揣﹐問落到塊﹐司公全--a才共解剖﹐講「戊子」是隔工的日子﹐「命到戊子前」的意思﹐定著是講王一鏢佇丁亥當日愛死﹐愛緊去大樹跤看māi leh。好--a一聽目屎隨就 liàn落來﹐喝一聲：「我的鏢--a喂！」。伊 tsông出去﹐結局才一出門﹐鼓吹的聲就倚來矣。Hia兵仔用八號鉛線共王一鏢縛咧﹐跤脊骿插一塊牌á寫「暴亂首謀」的罪名﹐用thô͘-la-khuh載leh遊村。好--a遠遠共hiu﹐王一鏢若親像有聽著﹐毋過斡頭過來﹐目神無接著﹐一下手就閣予彼陣摧魂的鼓吹聲揪遠去。好--a jiok過﹐tsông到位的時﹐大樹跤潮漉漉﹐已經箍滿滿攏是人矣﹐伊ná哮ná擠入去上頭前彼排﹐看著王一鏢跪leh﹐跤脊胼徛一ê兵仔提長槍共拄leh﹐面仔青筍筍無血色﹐心肝頭就艱苦﹐閣喝一聲「我的鏢--a喂！」這回王一鏢看著伊矣﹐喝一聲：「好--a！」怹目神才接做伙。好--a目屎khok-khok gô﹐感覺真毋甘﹐想欲tsông過共攬leh﹐毋過毋敢振動﹐閣一目睨﹐槍就 piāng矣﹐王一鏢哀一聲﹐胸坎霧血出來﹐倒落來晉前目睭閣金金﹐kah-na開嘴猶有話欲講。所有這一切攏看在李碌的眼內。


讀全文，請點：大港嘴 (05)

＊本節後半段是全新發表！