《讀詩筆記》黃恆秋介『 伙房下』

[陳寧貴]

當歡喜，傑出客家詩人黃恆秋，在1990年晴天霹靂樣仔，出版台灣第一本客家語詩集「擔竿人生」後，經過欲二十年，又出版第三本客家語詩集「客庄鄉音」，顯示出客家子弟在文學項介才能同韌性，想起欲二十年前當時，客家語文學界創作一片荒涼，想愛來學習資料乜盡難尋，毋過到現下，客家語介現代詩創作，已超過二三十儕共下煞猛寫作，也不時有作品發表。

「伙房下」係「客庄鄉音」詩集肚介一首詩，寫出客家庄分人感傷介變化。

「所有介人都走了/伸到一間老伙房」，一開始就透露出老伙房人去房空介孤寂。「開過千萬擺介門 / 無半點聲」，千萬擺係時間介流轉，連以前會愐起介記憶之聲也消失忒。

「只有屋面前介弓蕉樹/彎腰向地泥下/跈等一陣一陣涼風/講歸庄人介故事」，弓蕉樹 lau 風係在老伙房還做得感受到存在介景物。

「禾埕項/留下來介磨石、榖扒/親像毋記得麼介/乜毋想愛做麼介」，目珠轉到禾埕項，看著磨石、榖扒恬恬在該，頭擺介一切，蓋像一場夢。

「一陣屋簷鳥飛來又飛走哩」，該陣屋簷鳥，毋就係頭擺介我等麼？飛來又飛走，一代換一代，老輩走了，新輩也走了，伸到空空老伙房，分我等有時節暗暗吊掛定定----

本詩介表現手法，輕輕淡淡，就像老伙房介素描畫，毋過，其後背囥等盡重盡濃介鄉愁；想起現下介新生代，歇大樓房，仰會再對伙房、禾埕有印象，那欲再有麼介頭擺傳統鄉愁，想來斷真分人傷感無奈。這也關係到創作者，在懷舊介題材中創作，係毋係同新生代介生活脫節了。想起該場--羅思容「台灣客家歌謠中介女性圖像」座談會中，逐儕都講出傳統客家女性介悲情，這對新生代女性來講，單淨係聽講古樣仔，因為農業系統社會，該種一大群人，世世代代守等一大片田地，長年月久產生出來介倫理階級權威早就消失忒哩，現代女性生活在資訊爆發時代，就像生活在游牧系統社會，講究個人能力，毋係講究長者為王，現代客家女性早就擺脫底層弱勢者角色。故所，時代在變，創作也愛變，作品正有新生命，分人新感覺。




--------------------
《原詩》
黃恆秋/ 伙房下

所有介人都走了
伸到一間老伙房

開過千萬擺介門
無半點聲

只有屋面前介弓蕉樹
彎腰向地泥下
跈等一陣一陣涼風
講歸庄人介故事

禾埕項
留下來介磨石、榖扒
親像毋記得麼介
乜毋想愛做麼介

一陣屋簷鳥飛來
又
飛走哩